Rannsóknasetur Háskóla Íslands á Norðurlandi vestra, Sagnfræðingafélag Íslands og

ReykjavíkurAkademían bjóða upp á málþingið Fólk í heimildum – heimildir um fólk

laugardaginn 11. október næstkomandi. Þingið verður haldið í bókasafni Halldórs Bjarnasonar

í húsakynnum Rannsóknaseturs HÍ á Skagaströnd. Boðið verður upp á hópferð frá Reykjavík

með kvöldverð og gistingu á Gauksmýri í Húnaþingi.

Fólk í heimildum – heimildir um fólk

Heimildir um fortíðina innihalda margvíslegar upplýsingar um fólk og fræðimenn vitja

heimildanna gjarnan til þess að kynnast þessu fólki, lífi þeirra, hugsunum og tilfinningum

í von um að öðlast innsýn í fortíðina. En hversu raunsanna mynd af fólki í öllum sínum

margbreytileika gefa þær heimildir sem varðveist hafa? Og hvaða rétt hafa fræðimenn til

þess að rannsaka og skrifa um líf einstaklinga líkt og það birtist í heimildum sem aldrei voru

ætlaðar sjónum almennings eða urðu til við rannsókn yfirvalda á viðkvæmum stundum í

lífi þess? Fræðimenn sem vinna með slíkar heimildir standa þannig frammi fyrir ýmsum

álitamálum sem eru í senn aðferðafræðilegs, þekkingarfræðilegs og siðferðilegs eðlis. Þau

varða það m.a. hvort og þá hvað hægt sé að vita um fólk fortíðarinnar, hvernig skapa megi

merkingarbæra þekkingu um það og hvaða siðferðilegu takmarkanir og ábyrgð hvíli á

fræðimönnum sem starfa með heimildir um líf fólks. Málþingið er hugsað sem vettvangur til

að ræða þessi álitamál frá ólíkum hliðum og um leið að leggja fram tilgátur, varpa fram nýjum

spurningum og verða fyrir innblæstri fyrir áframhaldandi rannsóknir um fólk fortíðarinnar.

Dagskrá:

Sigurður Gylfi Magnússon

Fulltrúar fólksins! Er þá einhvers staðar að finna?

Lára Magnúsardóttir

Hver ber andlegar afleiðingar afbrota? Tilurð heimilda í sögulegu samhengi

Ólafur Arnar Sveinsson

Rannveig og Torfhildur í Kanada á 19. öld. Vangaveltur um aðferðafræðileg og siðferðisleg

vandamál við úrvinnslu sendibréfa

Vilhelm Vilhelmsson

Stílfært og sett í samhengi: Um sniðmát vitnisburða í réttarheimildum

Erla Hulda Halldórsdóttir

Fortíðin er framandi land.

Kristján Mímisson

Ævisöguleg fornleifafræði og fornleifafræði hins ævisögulega

Fundarstjóri er Sigurður Gylfi Magnússon

 

Málþingið hefst klukkan 13:00 og stendur til klukkan 17:00. Boðið verður upp á kaffi og

meðlæti í hléi. Aðgangur ókeypis.

 

Haustferð Sagnfræðingafélags Íslands og ReykjavíkurAkademíunnar

Í tengslum við málþingið Fólk í heimildum – heimildir um fólk sem haldið verður

á Skagaströnd laugardaginn 11. október munu Sagnfræðingafélag Íslands og

ReykjavíkurAkademían standa fyrir haustferð dagana 11.-12. október næstkomandi.

Ekið verður með hópferðabíl frá aðalbyggingu Háskóla Íslands sem leið liggur norður í

Húnaþing. Á Skagaströnd verður boðið upp á léttan hádegisverð áður en málþingið hefst.

Að loknu þingi verður ekið að sveitahótelinu Gauksmýri í Línakradal í Húnaþingi vestra þar

sem gist verður um nóttina. Þar verður boðið upp á sameiginlegan kvöldverð og um kvöldið

verður opinn bar á hótelinu. Á sunnudeginum verður komið við á Byggðasafni Húnvetninga

og Strandamanna á Reykjum í Hrútafirði þar sem aðgangur verður ókeypis og hópnum boðið

upp á leiðsögn um safnið og kaffiveitingar á afslætti.

Verð með gistingu auk hádegisverðar og kvöldverðar á laugardeginum er 27.000 kr en

skuldlausir félagsmenn í Sagnfræðingafélaginu og ReykjavíkurAkademíunni fá ferðina

niðurgreidda um 5000 kr.

Skráning fer fram HÉR

FaLang translation system by Faboba