Dagsbrúnarfyrirlesturinn 2020: fyrirlestur Maríönnu Traustadóttur

Að þessu sinni flytur Maríanna Traustadóttir sérfræðingur í jafnréttis- og umhverfismálum fyrirlestur um Alþjóðavinnumálastofnunina -ILO og áherslur sem þar eru lagðar og móta framtíðina á vinnumarkaði. Fyrirlesturinn verður haldinn í sal Eflingar á 4. hæð í Guðrúnartúni 2. Upplýsingar um hvenær fyrirlesturinn verður fluttur birtast um leið og þær liggja fyrir.

Nánar um fyrirlesturinn

Á tímum þrenginga er alþjóðleg samstaða launafólks mikilvæg. Hlutverk Alþjóðavinnumálastofnunarinnar – ILO  og áherslur hennar skipta máli og hafa áhrif á mótun framtíðar á vinnumarkaði. ILO er eina alþjóðastofnun Sameinuðu þjóðanna sem lýtur ekki aðeins stjórn ríkisstjórnanna heldur einnig launafólks og atvinnurekenda og minnir því sífellt á rétt verkafólks sem og almenn mannréttindi. Hvernig endurspeglast jafnréttiáherslur ILO á íslenskum vinnumarkað? Hvað getur Ísland lagt til í baráttuna um jafnrétti fyrir alla?

ILO hefur lagt sérstaka áherslu á sanngjörn umskipti, „just transition“ í kjölfar loftlagsbreytinga og áhrif þeirra á vinnumarkaðinn. Það hlýtur að vera á ábyrgð íslenskrar verkalýðshreyfingar að tryggð verði sanngjörn umskipti í þágu jafnréttis.

Nánar um fyrirlesarann

Maríanna Traustadóttir er sérfræðingur í jafnréttis- og umhverfismálum á skrifstofu Alþýðusambands Íslands og hefur unnið fyrir verkalýðshreyfinguna frá árinu 2000. Fyrst sem framkvæmdastjóri Starfsafls, starfsmenntasjóðs sem m.a. Efling – stéttarfélag á aðild að. Á árinu 2005 flutti hún sig um set og hóf störf hjá ASÍ.

Maríanna hefur verið fulltrúi ASÍ í fjölmörgum nefndum og ráðum á vegum hins opinbera sem vinna að jafnrétti á vinnumarkaði. Hún var fulltrúi launafólks í vinnu við gerð Jafnlaunastaðalsins á árunum 2008-2012 og í framhaldi fulltrúi ASÍ í aðgerðahóp stjórnvalda og aðila vinnumarkaðarins um launajafnrétti, 2012-2018 sem m.a. átti að vinna að innleiðingu jafnlaunavottunar á grundvelli staðalsins. Einnig hefur hún sl. 10 ár leitt vinnu ASÍ í umhverfismálum og á sæti í Loftlagsráði f.h. sambandsins.

Hún hefur gegnt trúnaðarstörfum fyrir íslenska verkalýðshreyfingu hér heima og erlendis. Á árunum 2009–2014 var Maríanna kennari og síðar rektor Genfarskólans, sem er norrænn lýðháskóli haldinn samhliða Alþjóðavinnumálaþinginu í Genf og dregur nafn sitt af því. Skólinn hefur starfað frá árinu 1931 og er rekinn af Norrænu verkalýðshreyfingunni.

Maríanna er baráttukona um málefni kvenna og hefur komið að undirbúningi 24. október/Kvennafrís 2005, 2010, 2016 og 2018.

Maríanna er með MA gráðu í félagsmannfræði frá háskólanum í Árósum.

Dagsbrúnarfyrirlestrar
Á hverju ári síðan 2003 hafa svokallaðir Dagsbrúnarfyrirlestrar verið haldnir á vegum Bókasafns Dagsbrúnar, Eflingar og ReykjavíkurAkademíunnar. Efni fyrirlestranna tengist ávallt verkalýðshreyfingunni.