Í erindinu verður því velt upp hvort rekstrarform markaðsdrifins háskólakerfis, þar sem þekking er gerð að söluvöru leiði til þess að skapandi vinna og hugmyndaauðgi verði undir. Hlutverk háskóla sem snýr að nýrri þekkingaröflun fái því ekki það rými sem þarf til þess að hún nái flugi.Sem dæmi má nefna að reglulega eru fyrirtækin Össur og Marel nefnd í tengslum við nýsköpun hérlendis, sem hafi m.a. orðið til í Háskóla Íslands, en þau voru stofnuð árin 1973 og 1983. Það er löngu áður en nýskipan í ríkisrekstri var innleidd og samkeppni milli skóla varð talin forsenda framþróunar þeirra.

Færð verða rök fyrir því að uppbygging háskólakerfisins og rekstrarlegar forsendur þess feli í sér að of lítið sé gert til að stuðla að því að nýsköpun geti sprottið úr akademíunni.

Næsti fyrirlestur í fundaröðinni verður haldinn 6. desember kl. 12 í sal Íslenskrar erfðagreiningar: Háskólar í fremstu röð – markaðsvæðing sem ýtir undir kynjamisrétti? Finnborg Salóme Steinþórsdóttir, nýdoktor í kynjafræðum.

Að fundaröðinni standa MARK, miðstöð margbreytileika- og kynjarannsókna, RannMennt, rannsóknastofa um menntastefnu, alþjóðavæðingu og félagslegt réttlæti og ReykjavíkurAkademían.

Fyrirlestraröðin er styrkt af rektorsskrifstofu Háskóla Íslands, Félagsvísindasviði og Menntavísindasviði.